Мэдээ: Монгол, Финландын харилцаа
Монгол Улсын Ерөнхийлөгч Финланд улсад төрийн айлчлал хийж байна
2026.10.23. Финланд. Хельсинк. Монгол Улсын Ерөнхийлөгч У.Хүрэлсүх Бүгд найрамдах Финланд улсад хийж буй төрийн айлчлал эхэллээ. Монгол Улсын Ерөнхийлөгч У.Хүрэлсүхийг Бүгд найрамдах Финланд улсын Ерөнхийлөгч Александер Стубб өөрийн ордондоо угтан авчээ. Монгол Улсын Ерөнхийлөгчийн скандинавын орнуудад хийх айлчлалын эхлэл, стратегийн гарц үүд нээх шинэ боломж, шинэ хамтрал эхлүүлсэн чухал ач холбогдолтой айлчлал болно гэдгийг талууд онцолсон байна. Айлчлалын хүрээнд хоёр улсын Ерөнхийлөгч ганцаарчилсан уулзалт, албан ёсны хэлэлцээ хийж, эрчим хүч, боловсрол, соёл, геологийн салбарын хамтын ажиллагааг өргөжүүлэх асуудлыг хэлэлцэхээр төлөвлөжээ. Мөн хоёр улсын Засгийн газар, байгууллага хоорондын 10 орчим баримт бичигт гарын үсэг зурахаар байна. Түүнчлэн Хельсинки хотод Монгол-Финландын бизнес форум зохион байгуулж, Монголын Үндэсний урлагийн их театрын уран бүтээлчид “Монголын сайхан орон” тоглолтоо толилуулах юм. Тухайлбал, боловсролын салбарт зарим их, дээд сургуулиудтай хамтран ажиллах, тус улсын Туркугийн их сургуультай хамтран гурван талт санамж бичиг байгуулах, хоёр талын худалдаа аж үйлдвэрийн танхимууд хамтын ажиллагааны баримт бичиг байгуулах, дэлхий судлалын шинжлэх ухааны хамтын ажиллагааны тухай санамж бичиг байгуулахаар төлөвлөжээ. Энэхүү айлчлал нь Монгол Улсын төрийн тэргүүний түвшинд Финландад хийж буй 16 жилийн дараах айлчлал юм. Монгол, Финланд улс 1963 оны долоодугаар сарын 15-нд дипломат харилцаа тогтоосон бөгөөд Финланд нь Монгол Улстай дипломат харилцаа тогтоосон Нордикийн анхны улс юм. Монгол Улсын Ерөнхийлөгч Ухнаагийн Хүрэлсүх Бүгд Найрамдах Финланд Улсын Ерөнхийлөгч Александер Стуббын урилгаар 2026 оны 10 дугаар сарын 22-24-ний өдрүүдэд тус улсад төрийн айлчлал хийж буй юм.
Монгол Улсын Ерөнхийлөгч У.Хүрэлсүх Бүгд Найрамдах Финланд Улсад төрийн айлчлал хийнэ
2026.10.19. Монгол Улсын Ерөнхийлөгч Ухнаагийн Хүрэлсүх Бүгд Найрамдах Финланд Улсын Ерөнхийлөгч Александер Стуббын урилгаар 2026 оны 10 дугаар сарын 22-24-ний өдрүүдэд тус улсад төрийн айлчлал хийнэ. Энэхүү айлчлал нь Монгол Улсын төрийн тэргүүний түвшинд 16 жилийн дараа Бүгд Найрамдах Финланд Улсад хийж буй айлчлал юм. Айлчлалын үеэр хоёр улсын Ерөнхийлөгч нар ганцаарчилсан уулзалт, албан ёсны хэлэлцээ хийж, эрчим хүч, соёл, боловсрол, геологи зэрэг салбарын хамтын ажиллагааг өргөжүүлэн хөгжүүлэх асуудлаар ярилцана. Хоёр тал Засгийн газар болон байгууллага хоорондын хамтын ажиллагааны 10 орчим баримт бичигт гарын үсэг зурахаар төлөвлөж байна. Төрийн айлчлалын үеэр Хельсинки хотноо Үндэсний урлагийн их театрын “Монголын сайхан орон” тоглолтыг толилуулж, Монгол-Финландын бизнес форумыг зохион байгуулна. Хоёр улс 1963 оны 07 дугаар сарын 15-ны өдөр дипломат харилцаа тогтоосон түүхтэй. Финланд Улс манай улстай дипломат харилцаа тогтоосон Нордикийн анхны улс юм.
Бүгд Найрамдах Финланд Улсын Ерөнхийлөгч Александер Стубб-тай уулзав
2025.09.03. Монгол Улс. Улаанбаатар хот. Монгол Улсын Ерөнхийлөгч Ухнаагийн Хүрэлсүх НҮБ-ын Ерөнхий Ассамблейн 80 дугаар чуулганд оролцох үеэрээ Бүгд Найрамдах Финланд Улсын Ерөнхийлөгч Александер Стубб-тай уулзав. Уулзалтын үеэр төрийн тэргүүн нар Монгол, Финландын уламжлалт найрсаг харилцаа, хамтын ажиллагаа сүүлийн жилүүдэд идэвхтэй өргөжиж байгаад сэтгэл хангалуун байгаагаа илэрхийлж, цаашид дээд, өндөр түвшний айлчлалын давтамжийг хадгалахын чухлыг онцлов. Бүгд Найрамдах Финланд Улсын Ерөнхийлөгч Александер Стубб Монгол Улсын Ерөнхийлөгчийг тус улсад айлчлахыг урилаа. Түүнчлэн хоёр улсын худалдаа, эдийн засаг, боловсрол, байгаль орчин, сэргээгдэх эрчим хүчний салбарт хамтын ажиллагааг хөгжүүлэх, “Илгээлт–2100” тэтгэлэгт хөтөлбөрийн хүрээнд монгол оюутнуудыг Финландын их, дээд сургуулиудад суралцуулах боломжийн талаар дэлгэрэнгүй санал солилцов. Түүнчлэн хоёр улсын НҮБ болон олон улсын байгууллагын хүрээн дэх уламжлалт хамтын ажиллагааг бэхжүүлэхээ талууд нотоллоо.
Финландын элчин сайд итгэмжлэх жуухаа өргөн барив
2023.03.27. Монгол улс. Улаанбаатар хот. Монгол Улсын Ерөнхийлөгч Ухнаагийн Хүрэлсүхэд Финланд Улсаас Монгол Улсад хавсран суух Онц бөгөөд Бүрэн эрхт Элчин сайд Лина-Кайса Миккола нар Итгэмжлэх жуух бичгээ өргөн барив. Ерөнхийлөгч Ухнаагийн Хүрэлсүх Элчин сайдыг үүрэгт ажилдаа орж буйд нь баяр хүргэж, ажлын амжилт хүсэв. Харилцаа, хамтын ажиллагааг бэхжүүлэхэд Элчин сайд нар хүчин чармайлт гаргана гэдэгт итгэж байгаагаа дурдаж, төр, засгаас бүх талын дэмжлэг үзүүлнэ гэдгээ илэрхийлэв. Түүнчлэн олон улсын хамтын нийгэмлэг, НҮБ болон олон улсын байгууллагын хүрээнд харилцааг бэхжүүлэхийн төлөө байгаагаа тэмдэглэв.
