Чингэлэг тээврийн терминалтай болно…
Гашуунсухайт, Шивээхүрэн боомтод чингэлэг тээврийн нэмэлт терминал байгуулах ажил 80 гаруй хувьтай үргэлжилж байна. Гашуунсухайт боомтод үерийн далан, чингэлэг тээвэр, урт болон богинын тээврийн зам талбайн ажил хийгдэж, барилга байгууламж, инженерийн шугам сүлжээний бүтээн байгуулалт төлөвлөгөөний дагуу гүйцэтгэж байна. Есдүгээр сард ашиглалтад орох уг терминалыг Энержи ресурс, Эрдэнэс Тавантолгой, Тавантолгой компанийн хөрөнгөөр байгуулж буй юм. Мөн Шивээхүрэн боомтын гаалийн хяналтын нэмэлт гарцыг Монголын Алт компани барьж, Хил хамгаалах ерөнхий газарт хүлээлгэн өгсөн бөгөөд чингэлэгт тээврийн терминалын зам талбайн ажил эхэлжээ. Хилийн боомтуудад чингэлэг тээврийн терминал байгуулснаар хүн хоорондын шууд харилцаа багасч, жолооч нар хил нэвтрэхгүйгээр шуурхай ажиллах боломж бүрдэхээс гадна нүүрсний тээвэрлэлтээс үүдэлтэй байгаль орчинд учирч буй сөрөг нөлөөлөл буурч, нүүрсний экспортын хэмжээ нэмэгдэх юм. Түүнчлэн Тавантолгой бүлэг ордоос экспортлох нүүрсийг задгай тээврийн хэрэгсэлд ачиж, буулгах, тээвэрлэх явцад гарах хорогдлыг багасгах, нүүрсний чанарыг алдагдуулахгүйгээр тээвэрлэх ач холбогдолтой юм. Хилийн боомт, улсын хилийн бүс, зурвас газруудад чингэлэгт тээврийн терминал байгуулах ажил Монгол Улсын Засгийн газрын 2021 оны долоодугаар сарын 2-ны өдрийн 185 дугаар тогтоолоор хэрэгжиж байна гэж Эрдэнэс-Монгол компанийн цахим хуудсанд дурджээ.
