Гантиг Вилла хотхонд байр захиалах нь нээлттэй…
Монгол Улсын Хөгжлийн банкнаас Монгол мах экспо ХХК-ийн санаачлан хэрэгжүүлэх Мах боловсруулах цогцолбор төв байгуулах төсөлд зориулж 2017, 2018 онуудад 3 удаагийн нийт 31,8 тэрбум төгрөгийн зээл олгосон байдаг. Гэвч уг зээлийн эргэн төлөлт хангалтгүй болж чанаргүй зээлийн ангилалд шилжсэн. Тиймээс Хөгжлийн банкнаас Монгол мах экспо ХХК, хамтран хариуцагч Бишрэлт пропертиз ХХК, Веллмарт ХХК-аас 32.1 тэрбум төгрөгийг эргэн төлүүлэхээр нэхэмжлэлийг шүүхэд гаргасан. Мөн Монгол Улсын Хөгжлийн банк нь УИХ болон ЗГ-аас батлагдсан 6 хөтөлбөрийн хүрээнд 92 төсөлд зориулан Капитал банктай Дамжуулан зээлдүүлэх гэрээг байгуулж 73.6 тэрбум төгрөгийн зээл олгосноос өнөөдрийн байдлаар 54.4 тэрбум төгрөгийн зээлийн үлдэгдэл байна. Дээрх 2 зээлийг Хөгжлийн банкнаас олгох үед нэг эзэнтэй, харилцаа хамаарал бүхий компаниуд байсан нь тогтоогдсон. Тиймээс Монгол мах экспо ХХК болон Капитал банкны хувьцаа эзэмшигч Бишрэлт холдинг ХХК нь эдгээр зээлийн өрийг барагдуулах үүрэг хүлээж байна. Дээрх байгууллагуудаас Өр төлбөр барагдуулах санал ирүүлсэний үндсэн дээр талууд 2022 оны 7 дугаар сарын 20-ны өдөр Өр төлбөр барагдуулж, үл хөдлөх хөрөнгийн өмчлөх эрх шилжүүлэх тухай гэрээг байгууллаа. Гэрээний үндсэн дээр зээлдэгч болон барьцаалуулагч нараас Монгол мах экспо ХХК болон Капитал банкны нийт зээлийн үлдэгдэл болох 86.6 тэрбум төгрөгт Гантиг вилла хотхоны 9 блок барилгыг 2022.09.07-ны өдөр Хөгжлийн банкны нэр дээр бүртгэлжүүлж авлаа. Ингэснээр Гантиг Вилла хотхонд үл хөдлөх хөрөнгө захиалах, худалдан авах нь иргэдэд нээлттэй бөгөөд Монгол Улсын Хөгжлийн банк нь Гантиг вилла хотхоныг Улсын комисст хүлээлгэн өгөх, худалдан борлуулахад дэмжлэг үзүүлэн ажиллахаар болж байна. Эргэн сануулахад, АТГ-аас Монгол Улсын Хөгжлийн банкны чанаргүй зээлдэгчдийг шалгах ажлын хүрээнд 2022 оны хоёрдугаар сард зөвхөн зээл олгогчоос гадна, зээл олгох шийдвэр гаргахад оролцсон албан тушаалтнуудын хөдлөх болон үл хөдлөх хөрөнгийг битүүмжлэх, захиран зарцуулах эрхэд хязгаарлалт тогтоосон юм. Үүний нэг нь Хан-Уул дүүргийн 11 дүгээр хороонд баригдаж буй Гантиг вилла хотхоны 9 блок барилга байсан. Тус хотхоныг Хөгжлийн банк өөрийн эзэмшилд бүртгэн авснаар 86.6 тэрбум төгрөгийн чанаргүй зээл эргэн төлөгдөх боломж бүрдэж байна. Нэг ёсондоо, Монгол Улсын Хөгжлийн банк нь ХУД-ийн 11 дүгээр хороонд баригдаж буй Гантиг Вилла төслийн хотхоныг өөрийн эзэмшилд бүртгэлжүүлж авлаа. Уг орон сууцны хотхоны барилгыг Монгол мах экспо ХХК-д Монгол Улсын Хөгжлийн банкнаас олгосон чанаргүй зээлийн төлбөрийг эргэн төлөлтөд суутгах зориулалтаар шилжүүлэн авсан болно. Ингэснээр Монгол мах экспо ХХК-ийн 100 хувийн хувьцаа эзэмшигч Эй Би Трэйд Групп ХХК-ийн хэрэгжүүлж буй Гантиг Вилла төслийн борлуулалтын орлогоор Хөгжлийн банканд төлөх ёстой өр зээлийг барагдуулахаар болж байна. Цаашид Гантиг Вилла хотхонд үл хөдлөх хөрөнгө худалдан авах иргэд Эй Би Трэйд Групп ХХК-тай захиалгын гэрээг байгуулах нь нээлттэй бөгөөд төлбөр тооцоог зөвхөн холбогдох гэрээнд тусгагдсан Монгол Улсын Хөгжлийн банкны дансанд хүлээн авахыг анхаарна уу. Монгол Улсын Хөгжлийн банк нь Гантиг вилла хотхоныг Улсын комисст хүлээлгэн өгөх, худалдан борлуулахад дэмжлэг үзүүлэн ажиллах болно гэжээ.
